Shqipëria do të përballet sot me Andorrën në ndeshjen e dytë kualifikuese të Euro 2020. Humbja me Turqinë solli largimin e trajnerit Panucci. Ervin Bulku do të drejtojë ekipin kombëtar në “Estadi Nacional”, ku do të synohet vetëm një fitore.
Në portë nuk do të ketë ndryshime, me Berishën që do ta nisë titullar. Hysaj pritet të mbetet në pozicionin e tij natyral, Ismajli do të konfirmohet nga minuta e parë, ndërkohë që Gjimshiti dhe Aliji pritet që të kompletojnë mbrojtjen.
Ndryshime do të ketë edhe në mesfushë, pasi nga minuta e parë me shumë mundësi do të aktivizohen Kaçe, Abrashi dhe Xhaka. Sulmi është dilema e madhe e ndeshjes së sotme.
Në sulm ka shumë dilema. Myrto Uzuni e ka vendin në formacion, ndërkohë që dilema është mes Balajt dhe Sadikut, me këtë të fundit më të avantazhuar. Në krahun e majtë me shumë mundësi do të aktivizohet Grezda.