Kjo mënyrë e përdorur nga autorët është përzgjedhur për të mos lënë asnjë gjurmë.
Rreth 200 gramë lëndë plasëse iu vendos në pjesën e parme të automjetit, 27-vjeçarit, Aleksandër Sadikaj. Hetuesit janë përqendruar tek pamjet filmike në vendet ku i riu ka kryer lëvizjet e fundit, për të zbuluar ku është kryer montimi i eksplozivit që i mori jetën të riut.
Gjithashtu verifikime dhe me pamjet filmike pranë vendit ku u regjistrua shpërthimi fatal, pasi telekomandimi i një eksplozivi me pult kryhet në një distancë të afërt. Për këtë arsye hetuesit dyshojnë se autorët kanë ndjekur deri në momentet e fundit viktimën deri në shpërthimin e lëndës plasëse.
Sigurimi i një pajisje të tillë mësohet se në treg varion nga 4 deri në 6 mijë Euro. Vetëm në vitin që lamë pas në qytete si Durrësi, Lezha e Elbasani policia ka ndaluar dhjetëra persona, të cilëve u janë gjetur eksploziv me telekomandë gati për shitje.