Deputeti i Partisë Demokratike, Saimir Korreshi ka kundërshtuar hapur hartën e re gjyqësore, duke e cilësuar një zgjidhje që do të shkaktojë pasoja të rënda të qytetarët.
Në një intervistë për në “ABC Live”, duke folur për vështirësitë ekonomike, me nota ironie, ai u shpreh se në Lushnje është e vështirë të martohesh, pasi të gjithë kanë ikur nga vendi.
Sipas tij, bujqësia është i vetmi aktivitet që mban Lushnjen, dhe se fermerët nuk trajtohen njësoj nga qeveria.
“Në fshatra janë djemtë beqarë se nuk u jep njeri nuse. Është hall i madh të martohesh në Lushnje. Nuk vjen njeri. Është për të qeshur, por me ikjen e gjykatës ky qytet po degradon ditë pas dite. Është vendim absurd i KLGJ. Krahas gjykatës duhet të kuptojmë që ikën edhe prokuroria. Është shkrirë gjykata e Kavajës dhe IEVP e Rrogozhinës nuk vjen në Lushnje, por shkon në Durrës. Unë jetoj në Lushnje, e përjetoj çdo ditë. Jetën time pasditeve, banoj në këtë qytet. Kam familjen, fisin, e shikoj që bizneset po kthehen në familjare. Nuk gjen djem për të punuar. Pronari punon vetë edhe banakier edhe kamerier. E vetmja mënyrë që ka popullaritet Lushnja është pjesa e bujqësisë, pavarësisht se edhe ata qahen. Vërtet mbjellin, por nuk shesin. Duhet një ndërhyrje e shtetit. Konkurrojnë shumë 200 fermerë dhe fitojnë vetëm ata që kanë teserën e PS. Unë do të propozoja që Lushnja dhe Divjaka të bëhen qark. Në numër popullsie kalojnë pesë qarqe. Ka rritje të punonjësve të bashkisë dhe zero shërbim”, tha deputeti.