Policia e Elbasanit ka vënë në pranga tre të rinj nga Fieri duke sekuestruar dhe një sasi kanabisi, që ata do e shisnin në këtë qytet.
Policia thotë se sërish kanë qenë qytetarët ata që kanë informuar efektivët. Në përgjigje, specialisët e Seksionit për Hetimin e Narkotikëve dhe Trafiqeve të Paligjshme në Drejtorinë Vendore të Policisë Elbasan arrestuan në flagrancë Xh.S., 23 vjeç, banues në Fratar, Mallakastër, A.T., 26 vjeç, banues në Darzezë, Fier dhe J.S., 37 vjeç, banues në Fier.
Gjatë kontrollit të ushtruar në automjetet e tyre, janë gjetur rreth 29 kilogramë lëndë narkotike e llojit kanabis, e cila u sekuestrua në cilësinë e provës materiale. Gjithashtu u sekuestruan dhe 2 automjete e 3 aparate celularë.
Materialet hetimore i kaluan Prokurorisë pranë Gjykatës së Shkallës së Parë Elbasan, për veprën penale ” Prodhimi dhe shitja e narkotikeve e kryer në bashkëpunim”.