Aktivistët e organizatës “Rebelimi i Zhdukjes”, në shenjë proteste për çështjet mjedisore, u ulën në mes të autostradës Grande Raccordo Anulare në Romë, duke paralizuar qarkullimin e mjeteve.
Ky veprim ka irrituar disa shoferë, të cilët, të revoltuar, kanë dalë nga makinat e tyre dhe kanë tërhequr me forcë aktivistët, me qëllim lirimin e rrugës.
Më pas, u nevojit ndërhyrja e policisë, e cila bëri të mundur lëvizjen e protestuesve.
“Rebelimi i Zhdukjes”, themeluar në Angli, e përkufizon veten si një lëvizje ndërkombëtare, në përgjigje të shkatërrimit ekologjik të shkaktuar nga aktivitetet njerëzore, bazuar në rezultatet shkencore.
Lëvizja bën thirrje për mosbindje civile jo të dhunshme për t’u kërkuar qeverive “të ndryshojnë kursin që po na çon drejt katastrofës klimatike dhe ekologjike”.