Prishtina do të presë sot mbledhjen mes dy qeverive, asaj të Shqipërisë dhe të Kosovës. Gjithçka është bërë gati për pritjen e kryeministrit Edi Rama dhe të delegacionit që e shoqëron.
Pritja dhe mbledhja do të mbahen në një hotel, ku delegacioni i qeverisë shqiptare pritet të arrijë aty në orën 10:45, derisa në orën 11:00 është planifikuar pritja e kryeministrit Rama nga kryeministri Albin Kurti. Mbledhja e dy qeverive do të fillojë në orën 11:15, ndërsa më pas është planifikuar një konferencë për shtyp.
Kryeministri Albin Kurti ka mbërritur në hotelin ku do të mbahet mbledhja. Ai është fotografuar nga përballë hotelit, duke shikuar vendin se ku do të vijë Rama. Në vendin ku do të zhvillohet mbledhja mes dy qeverive kanë mbërritur ministrat e kabinetit të Kurtit, si Liburn Aliu, Albulena Haxhiu, Xhelal Sveçla dhe Donika Gërvalla.
