Pas fjalës hapëse të mbledhjes së qeverive Shqipëri-Kosovë, kryeministri Edi Rama e nisi fjalën e tij duke përmendur marrëdhënien me kryeministrin Albin Kurti, ku tha se me të ka një sinergji të veçantë. Kreu i qeverisë shqiptare tha edhe se këtë sezon veror, nuk duhet të ketë kontrolle në kufi.
“Falenderoj Albinin, duke thënë publikisht që në sy të gjithë atyre që na ndjekin se është një kënaqësi e veçantë. Kur ne takohemi kemi një sinergji të plotë. Dua t’u kujtoj ministrave se kemi një protokoll të nënshkruar në prill në Morinë për kalimin praktik të kufirit.
Në këtë sezon është e palejueshme të kemi probleme të natyrës që kemi patur vite me parë dhe radha të pafundme për shkak të kontrolleve të pafundme.
Kemi ardhur me përfaqësues të kompanive për të prezantuar studimin e Portit të Durrësit i cili shtrihet nga Durrësi në Prishtinë me Portin pritës në Durrës dhe Portin e Thatë të Prishtinës çka përben një projekt me rëndësi strategjik i cili ka brenda edhe projektin e hekurudhës. Porti ushtarak me bazë të NATO-së në Durrës”.