Ish-kryeministri Sali Berisha, ka sulmuar Reformën në Drejtësi gjatë një takimi të mbajtur me intelektualë në lidhje me sfidat e sistemit gjyqësor.
Në fjalën e tij Berisha theksoi se asnjë pushtues nuk ia ka bërë një vendi këtë shkatërrim që reforma e George Sorosit i bëri sistemit të drejtësisë në Shqipëri.
Sipas ish-kryeministrit, vetingu i magjistratëve nga lart poshtë shkaktoi vakum në sistemin e drejtësisë, duke i hequr të drejtën e një procesi të rregullt qytetarëve, si dhe krijoi mundësi për kapjen nga ana e qeverisë.
“Harta e re gjyqësore e cila vjen në kundërshtim me Kushtetutën dhe ligjin për organizimin e Drejtësisë është Kapaku që i vihet arkivolit në të cilin e mbylli Reforma e Drejtësisë sistemin e drejtësisë në Shqipëri. Shqipëria kaloi në një proces unik, asnjë vend, asnjë komb, asnjë pushtues nuk ka guxuar t’i shkatërrojë një vendi tjetër sistemin e drejtësisë, siç e shkatërroi reforma e George Sorosit.
Edhe pushtuesit, kanë konventa për fusha të caktuara të cilat janë të detyruar t’i zbatojnë. Reforma shkatërroi me vetingun nga lart poshtë, të kundërshtuar nga opozita, jo se jemi kundër verifikimit të pastërtisë së figurave, por ne kemi qenë kundër metodës nga lart poshtë. Metodë e cila kishte dy probleme të mëdha madhore, atë të vakumit shkatërrimtar për sistemin dhe së dyti atë të futjes së duarve nga lart për sistemin. Mohimi që iu bë shqiptarëve për të pasur një proces të rregullt gjyqësor. Kjo reformë e rrënoi këtë të drejtë. Nuk është proces i rregullt kur t’i pret 10 ose 15 vite kur rrethanat dhe kushtet kanë ndryshuar që nga fillimi i procesit”. tha Berisha.