Nënkryetarja e LSI-së, deputetja Erisa Xhixho thotë se kryeministri Edi Rama në vend që të flasë për veton bullgare, duhet të shohi situatën brenda Shqipërisë. Për të, ngaqe kemi një qeveri të korrputuar, është shkaku pse vendi nuk po bëhet pjesë e familjes europiane. “Shqiptarët nuk e meritojnë një qeveri që i mban larg Europës, shqiptarët nuk e meritojnë një kryeministër që i qeveris keq”.
Postimi i plotë
Një ditë më parë, kryeministri paralajmëroi dështimin e radhës në përpjekjen për të hapur dyert e Europës. Ajo që Rama e përmbledh me një “jo, më fal” që na fton ta dëgjojmë nesër, nuk është gjë tjetër veçse dështimi i qeverisjes së tij për t’i hapur vendit dyert e BE-së.
Në vend që të flasë për veton bullgare, Rama duhet të hedhë një sy brenda kufijve të Shqipërisë. Një qeveri e korruptuar, indiferente ndaj problemeve të qytetarëve, e ka të vështirë të bëjë Shqipërinë pjesë të familjes europiane.
Është kjo arsyeja e vërtetë pse Rama paralajmëron dritën e kuqe edhe kësaj radhe. Jashtë dyerve të Europës është më e lehtë të vazhdosh të njëjtën rrugë, ndaj propaganda e lodhjes nga zgjerimi, e vetos bullgare që na mban peng edhe ne dhe burokracive të Brukselit do të na shoqërojë gjatë.
Shqiptarët nuk e meritojnë një qeveri që i mban larg Europës, shqiptarët nuk e meritojnë një kryeministër që i qeveris keq!