Për herë të parë në histori, ndeshjet e Seria A italiane do të arbitrohen nga një gjyqtare femër. Ky është vendimi i marrë nga grupi kolegjial i arbitrave të futbollit italian, që ka vendosur t’i besojë cilësive të Maria Sole Ferrieri Caputi për të vendosur drejtësi në duelet e elitës së sportit magjik përtej Adriatikut.
Ajo do bëhet kështu gruaja e parë që arbitron në Seria A dhe këtë e bën në moshën 31-vjeçare. E lindur në Livorno, ajo shkruajti një faqe të historisë në Dhjetor të vitit të kaluar. Caputi vendosi drejtësi në duelin e Kupës së Italisë, mes Cagliarit dhe Sitadelës, përballje në të cilën anuloi edhe tre gola.
Ajo filloi të arbitronte shtatë vjet më parë dhe u promovua në Serie C pesë vite më vonë. Gjithashtu arbitroi një ndeshje të Serisë B vitin e kaluar, disa muaj pasi Maria Marotta u bë gruaja e parë që e bën këtë në nivelin e dytë të futbollit italian.