Mijëra banorë u urdhëruan të evakuohen nga Sidnei jugperëndimor, qyteti më i madh i Australisë, ditën e sotme, pas shirave të rrëmbyeshëm dhe erërave të forta që godasin bregun lindor dhe kërcënojnë përmbytje në zonat që u goditën në mars.
Byroja e motit paralajmëroi për reshje të dendura shiu që mund të çojnë në përmbytje dhe rrëshqitje të dheut përgjatë rajonit të bregut lindor nga Newcastle në gjirin e Bateman në shtetin e Uellsit të Ri Jugor, me shirat që pritet të intensifikohen gjatë dy ditëve të ardhshme.
“Tani jemi duke u përballur me rreziqe në fronte të shumta – përmbytje të shpejta , përmbytje lumenjsh dhe erozioni bregdetar,” tha ministri i shërbimeve të urgjencës së Uellsit të Ri Jugor, Steph Cooke në një konferencë për mediat televizive.
Ajo u bëri thirrje njerëzve që të rishikojnë udhëtimet e pushimeve, me motin e ashpër që ka goditur në fillim të pushimeve shkollore.
“Kjo është një situatë emergjente kërcënuese për jetën,” tha Cooke.
Më shumë se 200 milimetra shi kanë rënë në shumë zona me disa të goditura deri në 350 milimetra, tha Byroja e Meteorologjisë, duke paralajmëruar për rreziqet e përmbytjeve përgjatë lumit Nepean.
Shirat e dendur bënë që diga kryesore e Sidneit të derdhej gjatë natës, thanë autoritetet e ujit, duke shtuar se modelimi tregoi se derdhja do të ishte e krahasueshme me një derdhje të madhe në mars 2021 në digën Warragamba.
“Nuk ka vend që uji të mbetet në diga. Ata kanë filluar të derdhen. Lumenjtë rrjedhin shumë shpejt dhe shumë të rrezikshëm. Dhe më pas kemi rrezik për përmbytje të menjëhershme, varësisht se ku janë shirat,” Shërbimi Shtetëror i Urgjencës – tha komisionerja Carlene York.