Ministrja e Shëndetësisë, Ogerta Manastirliu në një dalje për mediat pas mbledhjes së Këshillit të Ministrave, foli për rritjen e pagave për personelin mjekësor, si edhe për shpërblim për mjekët që punojnë larg banesave.
Duke filluar nga 1 korriku pagat e mjekëve dhe infermierëve do rriten me 6%. Ndërkohë sot është vendosur një shpërblim financiar në masën 15 mijë lekë në muaj për të gjithë ato mjekë që përfundojnë specializimin dhe ushtrojnë profesionin e tyre jashtë vendbanimit të tyre.
“Do prezantoj një akt të rëndësishëm, ka të bëjë me politikën e rritjes së pagave për personelin shëndetësor. Nga data 1 korrik, mjekëve, infermierëve, paga e tyre rritet me 6%. Kjo politikë është përfshirë në të gjithë mbështetjen që qeveria shqiptare ka për sistemin shëndetësor. Përgjatë 2 mandateve, rritja e pagave e tyre ka qënë konsistente. Duke filluar nga 1 korriku rritet dhe me 6%. Kemi vendosur dhe një shpërblim financiar me 15 mijë lekë në muaj për mjekët që ushtrojnë profesionin jashtë vendbanimit, do ta përfitojnë këtë shpërblim mbi pagën. Rritja e pagave do të vijojë, synojmë që të rriten 40% duke filluar nga ky vit e në vazhdim. Ndërkohë që rritja e pagave do të vijojë fokusi do të jetë në përmirësimin e kushteve të punës”.