Deputetja e Partisë Demokratike Albana Vokshi, teksa ka mbajtur fjalën ditën e sotme në protestën e organizuar nga ish-Kryeministri Sali Berisha kundër rritjes së çmimeve, është shprehur se dita e sotme do të jetë një fillim për rezistencën ndaj të keqes.
Vokshi u premtoi të gjithë grave dhe nënave shqiptare që kanë frikë për largimin e fëmijëve të tyre jashtë vendit, se qeveria nuk do të gëzojë asnjë pasuri të vjedhur, asnjë qindarkë të vjedhur e se të gjithë do të dalin para drejtësisë.
Albana Vokshi: Kam qenë në shumë protesta por kjo është me emocionuesja dhe më e madhërishmja. Jam shumë e lumtur t’ju drejtohem, kam nderin të jem zëri i mijëra vajzave e grave ndaj një regjimi që mbjell frikë. Mijëra njerëz janë mbledhur, na bashkon diçka shumë e madhe, jemi njerëz të sakrificës. Sot është një ditë e mirë për Shqipërinë, për demokracinë, një ditë e keqe për Ramën dhe qeverinë e tij. Është dita ti themi nuk na gënjen, blen, tremb dot. Largohu. Për ne nuk ka më kthim mbrapa derisa ta largojmë kryeministrin më të korruptuar. Është një likoni e babëzitur që nuk pyet për shqiptarët që vuajnë. Babëzia e tyre nuk pyet për qindra mijëra të papunë, për të rinjtë që po ikin, që qytetarët nuk marrin dot shërbimin shëndetësor. Të dashur qytetarë, këta nuk do të ndalen së grabituri paratë tona. Rama ka instaluar një regjim kundër qytetarëve, kudër pensionistëve kundër njerëzve që kërkojnë të jetojnë me dinjitet në vendin e tyre. Ka vetëm një mënyrë për t’ia dalur, të ngrijmë zërin. Vetëm protesta është rruga e vetme që njeh Edi Rama. Nuk do të dorëzohemi, do të denoncojmë emër pas emri të gjithë. Ne jemi sot këtu për të bërë edhe një premtim, premtojmë që këta këtu nuk do të gëzojnë asnjë pasuri të vjedhur, asnjë qindarkë të vjedhur,. Këta të gjithë duhet të dalin para drejtësisë. Nuk do të ketë asnjë bankë ku ata do të fshehin pasuritë e tyre. Ka vetëm një mënyrë, vetëm duke reaguar e duke prezantuar. Le të jetë 7 korriku dita e bashkimit të të gjithë shqiptarëve që e duan Shqipërinë. Kur ngremë zërin, vetëm atëherë dëgjohet.