Brenda një tende cirku të mbushur plot me njerëz në Francë, akrobatja ukrainase Anastasiia Mazur argëton të pranishmit me numrat që realizon.
31-vjeçarja u largua nga atdheu i saj disa javë pasi Rusia filloi sulmin. Dhjetëra akrobatë, kllounë dhe xhonglerë iu përgjigjën kërkesës së një drejtori të një teatri francez për të organizuar një shfaqje për të rritur ndërgjegjësimin për luftën.
“Kjo shfaqje ka të bëjë me atë që po ndodh aktualisht në Ukrainë në një mënyrë estetike, por duke mbajtur aspektet dramaturgjike dhe duke e bërë atë të përshtatshme për të gjithë audiencën. Pra shmangia e dhunës ekstreme është e rëndësishme sepse ka fëmijë të vegjël. Por mendoj se e gjithë audienca mund të krijojë versionin e vet të historisë nga ajo që ne i ofrojmë”.
Trupa e sapoformuar e ka quajtur veten “Zirka”, që do të thotë yll në ukrainisht. Disa prej pjesëtarëve të kësaj trupe kanë lënë njerëzit e tyre të dashur në Ukrainë, të tjerë mbërritën me fëmijët e tyre dhe gjërat që mundën të merrnin.
“Ti e ndjen se është e rrezikshme, por ke dy zgjedhje, të shpëtosh ose të qëndrosh. Dhe gjithmonë brenda meje kam qenë i dyzuar, njëherë i thoja vetes që duhet të qëndroja dhe nga ana tjetër mendoja për familjen që duhet ta mbaja atë”.
Organizatorët thonë se shfaqja është një ekspozitë shprese dhe lirie. Në disa akte, interpretuesit veshin veshje të stilit ushtarak dhe mbulohen me flamurin e tyre kombëtar.