Ai ishte ministri që firmosi vetingun në polici, dhe sot ka kritika për ndryshimet që po i bën maxhoranca atij ligji. Fatmir Xhafaj, ish ministër i Brendshëm, në fjalën e tij në Kuvend shprehu keqardhje për ato që ai i quajti alibi false për mozbatimin në kohë të vetingut në polici.
“Policia nuk është pasuri e partive, por shtyllë e shtetit të së drejtës. Vetingu mbetet instrument kyç. Keqardhje që me alibi false nuk u bë i zbatueshëm në kohë, por për dy vite futëm në procesin e zbatimit në drejtësi. Gjithsesi më mirë se vonë se kurrë, nuk është herezi ndryshimi i një ligji, por në vlerësimin tim ndryshimet nuk janë të duhura në disa arsye, mund të cënohet pavarësia e procesit”, tha Xhafaj në Kuvend.
Sipas tij është një skanim i veçantë dhe nuk mund të bëhet nga SHÇBA, që është në varësi të ministrit. “Një nga sukseset e vettingut në drejtësi është se është i besueshëm nga të gjithë. Së dyti cenohet cilësia dhe shpejtësia e procesit. SHÇBA-ja nuk ka kapacitetet për ta kryer këtë proces”, tha Xhafaj.
Ai shtoi: “Ti besojmë vettingun 13 mijë punonjësve një institucioni që ka 100 punonjës vlerësoj se do ta ngadalësojë procesin. Argumenti financiar nuk është i justifikuar, ajo shumë që mendohet se do të kursehet 2 mln euro, është e papërfillshme nga ajo që pritet. Por një gjë është pozitive, nuk preket thelbi i vlerësimit dhe kriteret”.