Në fjalën e tij në seacën e kësaj të enjte në Kuvend, deputeti demokrat Gazment Bardhi e ka quajtur drejtësi që u jep imunitet personave që nuk preken nga ligji, “Drejtësinë e re”. Po ashtu ai u shpreh se drejtësia e re vijon të godasë qytetarin e thjeshtë dhe t’i japë përparësi të pasurve në vend. Sipas deputetit,të gjithë institucionet e drejtësisë ulin kokën dhe janë në garë se kush t’i shërbejë më parë Edi Ramës.
“Drejtësia e ka marrë emrin e re, por në sjellje vijon të jetë e vjetër, vijon të godasë në palcë qytetarin dhe u jep imunitet atyre që vijojnë të jenë të paprekshëm. Në 5 vjet sipas të dhënave të ministrisë 3304 qytetarë janë dënuar për veprën penale ndërtim i paligjshëm, ata kanë rregulluar çatinë apo dhomën e gjumit të fëmijëve të tyre.
Ata nuk i kanë shërbyer syrit të institucioneve. Bashkia prokuroria kanë shkuar dhe gjykata ka dënuar. Të paprekshmit mund të ndërtojnë afër, në lagjen ku banon drejtuesi i SPAK apo Drejtori i Policisë. Zoti prokuror ngrini kokën dhe shikoni, bëjeni pa marrë leje nga Edi Rama, drejtësia që u tregon dhëmbët 3304 qytetarëve dhe ul kokën para oligarkëve të Edi Ramës nuk është drejtësi e re, por është më e vjetër se sa drejtësia e vjetër.
Drejtësia e re do të jetë kur Edi Rama të jetë i barabartë me 3304 qytetarët e këtij vendi.Drejtësia e re do të jetë thjesht drejtësia e paprekshmëve të rinj. Drejtësia e re e të paprekshmeve nuk rregullohet as me rezoluta dhe as me rekomandime, por duke larguar atë që jep lejet e të paprekshmeve”.