Këtë të premte, qeveria prezantoi nismën për amnistinë fiskale. Ambasadorja e Francës në Tiranë, Elizabet Barsacq dhe ai i Gjermanisë, Peter Zingraf kanë qenë të ulur në rreshtin e parë të të ftuarve. Ata dëgjuan ministren e Financave, zv.kryeministrin Arben Ahmetaj dhe një barrister nga Britania e Madhe për amnistinë, specifikat e ligjit dhe përfitimet nga nisma.
Por kur kryeministri Edi Rama mori fjalën, ambasadorja franceze i ka bërë një shenjë kolegut gjerman. Të dy janë çuar në këmbë dhe kanë braktisur takimin. Ky moment është kapur nga regjia e kryeministrisë, që është përpjekur ta shmangë largimin demonstrativ të ambasadorëve.
Kreu i qeverisë, Edi Rama duket se ka mbetur keq dhe pas një pauze disa sekonda ka nisur t’u flasë ambasadorëve në mungesë. Në fjalën e tij, Rama ka kërkuar respekt nga ndërkombëtarët, që nuk mund ta trajtojnë Shqipërinë si një vend armik.
Qëndrimi i tyre vjen në një kohë edhe vetë ndërkombëtarët janë kundër amnistisë fiskale, që sipas tyre rrezikon të pastrojë paratë e krimit dhe korrupsionit.