Presidenti i Ukrainës, Volodymyr Zelensky i bëri thirrje komunitetit ndërkombëtar të shpallë Rusinë një shtet terrorist. Kjo kërkesë vjen pasi në sulmet me raketa në qytetin qendror të Vinnytsia mbetën të vrarë të paktën 23 persona, përfshirë 3 fëmijë.
“Kjo ditë tregoi edhe një herë se Rusia duhet të njihet zyrtarisht si shtet terrorist. Asnjë shtet tjetër në botë nuk përbën një kërcënim të tillë terrorist sa Rusia. Asnjë shtet tjetër në botë nuk i lejon vetes të shkatërrojë qytete paqësore dhe jetët e njerëzve të thjeshtë me raketa “cruise” dhe zjarr artilerie”.
Tre raketat “cruise” të lëshuara nga nëndetëset ruse në Detin e Zi goditën një qytet larg frontit të luftës në Donbasin lindor, duke shkaktuar përveç 23 viktimave, edhe 100 të plagosur. Në shënjestër u vu një parking, një pallat 9-katësh dhe godina të tjera banimi. Mes viktimave është edhe një vajzë 4-vjeçare, karroca e të cilës u fotografua e braktisur në zonën e sulmuar. Sipas zyrës së prokurorit të përgjithshëm në Kiev, 352 të mitur janë vrarë që prej fillimit të luftës.