Pas humbjes së Tiranës në ndeshjen e parë përballë Zrinjski Mostar, ka nisur përplasja e tifozëve me policinë jashtë ambienteve të stadiumit ‘Air Albania’. Për pasojë është plagosur një efektiv. Tifozët boshnjakë kanë nisur përleshjen por mbetet ende e paqartë aryseja pasi ishin fitues me rezultatin 0-1 bë ndeshjen e parë të turit të dytë kualifikues në Conference League.
Në pamjet e siguruara nga mediat duket momenti kur forcat e policisë vrapojnë për të shkuar drejt vendit të ngjarjes dhe për të ndaluar përshkallëzimin e sherrit. Megjithatë tifozët duket se nuk janë qetësuar dhe ka vijuar përplasja mes tyre.
Goli që vulosi ndeshjen që u luajt në stadiumin ‘Air Albania’ u realizua në pjesën e parë nga Bilbijë në minutën e 12 me penallti.
Gjithsesi Tirana do synojë përmbysjen në ndeshjen e kthimit që luhet të enjten e ardhshme në Bosnje. Kjo është humbja e dytë radhazi për kampionët e Shqipërisë në Kupat e Europës pasi një jave me parë e eliminoi Dudelange nga kualifikueset e Champions League.
Në stadiumin ‘Air Albania’ ishin rreth 250 tifozë nga Bosnja. Ndërsa në krahasim me ndeshjen e një jave më parë mes Tiranës kundër Dudelange, sot kishte më pak tifozë të bardhebluve pasi mund të jenë zhgënjyer nga eliminimi në turin e parë të Champions League.
