Gjatë takimit me kryetarët e rinj të degëve të Partisë Socialiste, kryeministri Edi Rama u ndal sërish në sulmin kibernetik, me të cilin sistemet e shërbimeve shtetërore u përballën ditët e fundit.
Kreu i qeverisë u shpreh se pas sulmit qëndron një shtet i tërë dhe nuk bëhet fjalë për hakera dosido, ndërsa shtoi se dy janë shtetet që dyshohen të jenë pas këtij sulmi.
“Është sulm i organizuar nga një shtet, jo çështje hakerash sado të jenë. Është një shtet mbrapa këtij sulmi. Nuk jemi ende të identifikojmë shtetin, 2 janë dyshimet, e them këtë për të thënë që sulmi është jashtëzakonisht kompleks dhe agresiv. Sistemet nuk kanë ceduar në aspektin e shkatërrimit të tyre, nuk janë zhdukur të dhënat e shtetit, aq më tepër që nuk rrinë ashtu siç e imagjinojnë njerëzit. AKSHI nuk mban të dhëna. Dokumentet janë aty.
Ka lajme të rreme pa lidhje. Është e paimagjinueshme që të shpifet pa hesap, pa përgjegjësi, pa asnjë lloj logjike duke i thënë njerëzve që është vënë gjobë 30 milionë euro ndaj qeverisë a thua se jemi përballë një bande digjitale që vënë gjoba. Nuk jemi në këto kushte por në kushtet e një sulmi kibernetik të super sofistikuar që ka përfshirë në procesin e mbrojtjes dhe të kundërsulmit NATO-n”, tha Rama.