Një operacion antidrogë u zhvillua këtë të mërkurë në Fier. Dy persona u arrestuan, ndërsa një tjetër është shpallur në kërkim. Në pranga janë vënë Fatjon Gremi dhe Amarildo Xhafa, ndërsa në kërkim u shpall Selami Lushkaj.
Policia u vu në ndjekje të një automjeti tip “Ford” që dyshohej se kishte lëndë narkotike, e që po lëviste nga Bypass në drejtim të Fierit.
Gjatë ndjekjes së mjetit, uniformat blu janë penguar nga një makinë tip “Benz”, që i siguronte rrugën automjetit tip “Ford”, duke iu rrezikuar jetën punonjësve të policisë me manovrat që kryente për t’i shpëtuar ndjekjes.
Drejtuesi i “Ford”, Fatjon Gremi, 40 vjeç braktisi automjetin dhe tentoi t’iu shpëtonte policëve, por arratisja përfundoi shumë shpejt, pasi u kap në tokat e këtij fshati. Gjatë operacionit, u arrestua edhe drejtuesi i automjetit tip “Benz”, Amarildo Xhafa.
Nga kontrolli i ushtruar në automjetin tip “Ford”, u gjetën dhe u sekuestruan 83 kg lëndë narkotike cannabis sativa.