Ajo ëndërron të ketë suksesin e Dua Lipës apo Rita Orës.
Vanesa Sono është një vajzë 20-vjeçare nga Saranda e cila sapo ka nisur hapat e parë ndërkombëtare në rrugën e muzikës. Sono dikur ka fituar “Gjeniu i vogël” ndërsa sot kënga e saj “Slay me” është transmetuar dhe nga BBC-ja.
20-vjeçarja në një lidhje me Skype me “ABC e Mëngjesit”, u shpreh shumë krenare për rrugëtimin e deritanishëm në Britani dhe tha se po bën çmos që të ndjekë hapat e Rita Orës dhe Dua Lipës.
“Jam shumë shumë krenare, nuk e prisja që do të ndodhte kaq shpejt. ‘Slay me’ e mori vëmendjen që doja nga BBC, RADIO KISS FM. Shpresoj që të më presin gjëra të mrekullueshme. Nuk dua të flas para kohe, do ta lë punën të flas vetë. Unë po bëj çmos që të jem në hapat e Rita Orës, Dua Lipës dhe shpresoj që të kem fatin e njëjtë”, tha Vanesa.
Më tej, ajo zbuloi dhe reagimet e prindërve në çastin kur radio BBC transmetoi këngën e saj “Slay me” pasi ndodheshin të tre në makinë.
“Kur u dha për herë të parë në BBC kemi qënë në makinë bashkë me mamin dhe babin. Ishte një moment shumë i rëndësishmë për mua. Herë të tjera e kam dëgjuar nga laptopi. Mami dhe babi sigurisht që janë mbështetësit e mi më të mëdhenj, ata kanë bërë gjithçka për mua që nga ardhja në Angli. Mami dhe babi u ndjen shumë të lumtur, babi u përlot pak se është tip i ndjeshëm si mua. Të them të drejtën ka pasur paragjykimi se është ai steriotipi që ke ardhur nga Shqipëria. Po unë nuk e kam vrarë mendjen se jam krenare që jam shqiptare”, shtoi 20-vjeçarja.