Presidenti i Italisë, Sergio Mattarella pranoi dorëheqjen e dytë të kryeministrit Mario Draghi dhe menjëherë shpërndau Parlamentin. Data e votimit të parakohshëm është caktuar 25 shtatori. Kreu i Shtetit njoftoi se qeveria e Draghit do të qëndrojë në detyrë deri pas zgjedhjeve, kur të vijë kabineti i radhës.
“Periudha që po kalojmë nuk lejon pauza në masat shumë të nevojshme që duhen për të luftuar efektet sociale dhe ekonomike të krizës dhe veçanërisht ndaj rritjes së inflacionit, e cila është shkaktuar kryesisht nga rritja e kostos së energjisë dhe ushqimit, duke shkaktuar pasoja të rënda për familjet dhe bizneset”, tha Mattarella.
Draghi largohet një vit e gjysmë pasi u emërua si kreu i pazgjedhur i një qeverie uniteti. Kjo pasi tre parti të koalicionit të tij qeverisës refuzuan ta mbështesin në votëbesimin e mbajtur në Senat gjatë të mërkurës. Kryeministri në largim falenderoi bashkëpunëtorët duke theksuar se ndihet krenar që u ka shërbyer qytetarëve të tij.