Gent Gazheli, drejtor i Përgjithshëm i Doganave, reagon publikisht pas lajmit që ëhstë publikuar dje në media se ai ka punësuar persona nën hetim në Greqi. Ai nxjerr me emër pronarin e mediave dhe botuesin Irfan Hysenbelliu dhe thotë se po e shantazhon për një gjobë që ka marrë biznesi i tij.
“Irfan Hysenbelliu është betuar që nuk do të m’i falë borxhet që i ka shtetit! Mediat e tij janë hedhur në një sulm personal me shpifje e fyerje personale, sapo “Birra Tirana” ka marrë gjobën e merituar sipas ligjit për fshehje të ardhurash në një shumë të konsiderueshme”, shkruan ndër të tjera Gazheli. Ky është reagimi i dytë për rastin, por i pari me emër e mbiemër.
Në krah, kreut të Doganës Shqiptare i ka dalë dhe kryeministri Edi Rama. Ai shpërndan reagimin e Gent Gazhelit dhe ka një pyetje.
“Pyetja ime është: Si luftohet me shpifjen apo qoftë edhe me akuzat legjitime në këtë vend, kur jo vetëm media që shpif apo akuzon, po edhe mediat e tjera s’ia japin të drejtën e fjalës personit publik të akuzuar, nëse ky i fundit flet hapur për një shantazh nga një pronar mediash?!”,- shkruan Edi Rama.
