Jack Fenton, një i ri nga Britania e Madhe ka ndërruar jetë, pasi u godit nga rotori i bishtit të një helikopteri teksa po qëndronte me pushime në Greqi.
Në pranga ranë dy pilotët dhe një pjesëtar i ekuipazhit tokësor. Mbi ta rëndon akuza e vrasjes nga pakujdesia.
22-vjeçari i ndjerë ishte mes një grupi pushuesish që ktheheshin nga ishulli grek i Mykonos me helikopter privat dhe sapo kishte zbritur në një aeroport afër Athinës.
Thuhet se ai kishte ecur pas helikopterit, motori i të cilit ishte ende në punë.
Hetuesit do të shqyrtojnë nëse janë ndjekur procedurat e nevojshme përpara se pasagjerët të lejoheshin të dilnin, megjithëse burime policore i kanë thënë BBC-së se piloti kryesor kishte përvojë.