Kryeministri Edi Rama ka reaguar për njohjen e pensioneve nga Shqipëria dhe Italia.
Shefi i qeverisë shkruan se tani do të ndiqen procedurat për ratifikimin e kësaj marrëveshje në mënyrë që 500 mijë shqiptarë të përfitojnë me hyrjen e saj në fuqi.
“LAJM I MIRË. Shqipëria dhe Italia sapo kanë përfunduar negocimin teknik të marrëveshjes për pensionet. Pas përfundimit të procesit teknik do të ndiqen procedurat për ratifikimin e kësaj marrëveshje dhe më në fund, pas një përpjekje të gjatë e thuajse të pamundur, rreth 500 mijë shqiptarë pritet të përfitojnë me hyrjen e saj në fuqi”, tha Rama.
Duke nisur nga viti 2023, qeveria italiane do të njohë vitet e punës në Shqipëri për emigrantët shqiptarë që jetojnë e punojnë në shtetin fqinj. Kështu, ajo iu ka dhënë atyre të drejtën e pensionit në momentin që arrijnë moshën. Parlamenti italian e ka përfshirë këtë në projekt-buxhetin e Italisë për vitin 2022.