Dosja e Autoritetit për Informim mbi Dosjet e Sigurimit të Shtetit ku thuhet se Ilir Meta ka qenë bashkëpunëtor i ish-Sigurimit të Shtetit, ka trazuar politikën.
Kryetarja e grupit parlamentar të Partisë Drejtësi, Integrim dhe Unitet, Mesila Doda zhvilloi një takim me kryetaren e Kuvendit, Lindita Nikollën. Në një prononcim për mediat, Doda tha se duhet të bëhet ligj që largon të kaluarën e errët. Kurse kërkesa e saj për Lindita Nikollën është që të bëjë pastërtinë e figurës për deputetët.
“Pas 32 vitesh kemi mes nesh njerëz që kanë të kaluar të errët, kjo do të thotë se është dështim i politikës shqiptare që nuk kemi ndërruar brezat dhe të sjellim njerëz të pashantazhueshëm. Besoj se është koha që në sesionin e ri parlamentar të nisë një punë e re serioze jo vetëm me propozimet e Autoritetit, por me heqjn e të gjithë personave me të kaluar të errët. Duhen bërë publik emrat, nuk vijojmë dot që të marrim me mend se kush janë. I kërkova kryetares së Kuvendit që të kërkojë pastërtinë e figurës për 140 deputetët”.