Rrëmbehet në Itali shoferi shqiptar. Pasi e ndaluan në rrugë, e detyruan të zbriste nga kamioni

Policia italiane është vënë në alarm pasi një shofer me origjinë shqiptare u rrëmbye dhe u grabit. Sikurse raportojnë mediat italiane, disa grabitës në Rrugën Shtetërore 16 bis, Barletta Sud, kanë bërë sikur u është prishur makina për të ndaluar shoferin e një kamioni.
Shoferi, i cili rezulton shtetas shqiptar, është ndalur për t’i ndihmuar kur ka parë makinën e grabitësve të ndaluar në mes të rrugës. Mirëpo ai ka rënë pre e grabitjes. Ata rrëmbyen shqiptarin dhe naftën e kamionit, i cili ishte nisur nga Bari dhe po kthehej në kompani.
Shoferi i rrëmbyer dhe kamioni u gjetën pas disa orësh kërkime, ndërsa puna për kapjen e grabitësve vijon.
Shqiptari ka treguar se 3 personat e kishin detyruar të dalë nga makina duke e tërhequr zvarrë. Më pas e kishin lënë të lirë pasi i kishin vjedhur naftën.