Alarmi për Zaporizhzhinë ishte në qendër të mbledhjes së Këshillit të Sigurimit të OKB-së. Shtetet e Bashkuara dhe OKB me Sekretarin e Përgjithshëm Guterres, bëjnë thirrje për krijimin e një zone të demilitarizuar në zonë. IAEA (agjencia ndërkombëtare e energjisë atomike) po ashtu bën thirrje për ndalimin e operacioneve ushtarake në zonë. Ushtria e Ukrainës, ka marrë nga Perëndimi edhe 1.5 miliardë euro.
Kjo shumë është premtuar nga 26 shtete, të cilat janë përfaqësuar nga ministrat e Mbrojtjes, në një konferencë të mbajtur në Kopenhagen. Ministrat e Mbrojtjes të Polonisë, Sllovakisë dhe Republikës Çeke, kanë shprehur gatishmëri për të zgjeruar prodhimin e sistemeve të artilerisë, municionit dhe pajisjeve tjera ushtarake në Ukrainë, ka thënë ministri danez.
Britania është zotuar se do të ndajë 300 milionë euro shtesë, përfshirë sistemet raketore me precizitet të lartë që mund të godasin shënjestrat në largësi prej 80 kilometrash. Ukraina i ka bërë thirrje të vazhdueshme Perëndimit që t’i dërgojë më shumë armë, përfshirë artilerinë me rreze të gjatë.