Marrja me qira e një banesë në Holandë, e përdorur më pas nga persona të tjerë, për të kultivuar kanabis, i ka kushtuar shumë ushtarakut shqiptar Ermal Dinoshi, i trajnuar disa herë në Amerikë dhe Kanada. Ministria e Mbrojtjes ka deklaruar se ministri Niko Peleshi ka urdhëruar nxjerrjen e tij në dispozicion.
Policia Ushtarake thotë Ministria e Mbrojtjes ka vijuar procedurat ligjore për këtë rast. E ka marrë në pyetje Major Dinoshin për incidentin në Holandë.
“Theksojmë se nuk mund të ofrojmë më shumë informacion momentalisht, duke respektuar kryerjen e veprimeve hetimore proçedurale për personat nën hetim dhe statusin e tyre për aq kohë sa nuk përfunduar hetimi çështjes” thotë Ministria e Mbrojtjes.
Ministria e Mbrojtjes thekson se “ pas sigurimit të informacionit më të plotë dhe dokumentacionit të ardhur është propozuar pezullimi nga detyra e Major Dinoshit, proçedurë e cila është finalizuar me daljen e urdhrit përkatës të Ministrit të Mbrojtjes”.
Ne thotë Ministria e Mbrojtjes do të jemi proaktivë në parandalimin dhe ndëshkimin e çdo rasti sado të izoluar për të mos prishur imazhin e Forcave të Armatosura brenda dhe ashtu jashtë vendit.
Major Ermal Dinoshi i përzgjedhur për të qenë pjesë e një misioni bashkëpunimi me ushtrinë e Holandës, në kuadër të NATO-s, ishte vënë nën hetim me dyshim si i përfshirë në aktivitet kriminal. Dinoshi, sipas të dhënave nga policia e Holandës dyshohet se në bashkëpunim, me persona të tjerë ngritën një shtëpi për rritje kanabisi në qytetin Brunsum.
Ushtaraku Ermal Dinoshi u përfshi në këtë histori pasi duke përdorur pasaportën e tij mori një shtëpi me qera nën mirëbesim për një të afërm i cili më pas e përdori për rritje kanabisi.