Edhe pse tragjeditë ndodhin, sërish në det ka mjete ujore që përdoruesit e tyre nuk respektojnë ligjin. Policia Kufitare e Shëngjinit, informon se ka konstatuar në zonën e quajtur “Rana e Hedhun”, tre mjete lundruese “Jet ski”. Drejtuesit e mjeteve lundruese janë ndëshkuar, pasi nuk dispononin dokumentacionet përkatëse për daljen në det dhe drejtimin e mjeteve.
Njoftimi i plotë
“Shërbimet e Policisë Kufitare Shëngjin, në vijim të kontrolleve përgjatë gjithë vijës bregdetare të qarkut Lezhë, në kuadër të masave të marra për mbarëvajtjen e sezonin turistik, kanë konstatuar në det, në zonën e quajtur “Rana e Hedhun”, 3 mjete lundruese “Jet ski”, të cilat janë shoqëruar për verifikim.
Gjatë verifikimeve, ka rezultuar se drejtuesit e këtyre mjeteve lundruese nuk dispononin dokumentacionet përkatëse për daljen në det dhe drejtimin e mjeteve “Jet ski”.
Në vijim të veprimeve, 3 drejtuesit e mjeteve lundruese u ndëshkuan me masa administrative, 10.000 dhe 20.000 lekë të rinj, bazuar në ligjin Nr. 127/2020, neni 14, pika 1, si dhe u bënë bllokimet e mjeteve të tyre”,-njofton policia.