Policia ka raportuar me qindra raste ku pjesë e shkeljes së ligjit janë të mitur. Për periudhën janar-korrik të këtij viti janë evidentuar 1008 të mitur si autorë të dyshuar të veprave penale.
“Tipologjia që vëmë re ne si institucion është se të miturit autorë të veprave penale nën 14 vjeç zënë rreth 37 % të totalit të të miturve të përfshirë. Shumica e tyre në tërësi përfshihen më së shumti në krimet kundër pronës, në vjedhje por edhe në shkelje të rregullave të qarkullimit rrugor, drejtojnë automjete pa patentë”, thotë shefja e sektorit për të miturit dhe dhunën në familjet, Silvana Alimadhi.
Referuar të dhënave të Policisë së Shtetit, përfshirja e të miturve në krime në 7 muajt e parë të këtij viti, përbën 5 % të nurmit total të veprave penale që janë kryer në Shqipëri. Policia shikon tek oficerët e sigurisë në shkolla, figurën kyçe në parandalimin e përfshirjes së të miturve në krime ndaj dhe në strategjinë e re do të kërkohet fuqizimi i rolit të tij.