Gjyshi i Asmer Bilalit kërkon lirimin e nipit të tij për dy ditë gjer sa të përfundojnë ritet mortore për babain e tij Astrit Bilali dhe xhaxhain që mbetën të vrarë në atentat në pragun e shtëpisë në Shkodër.
Në një prononcim për mediat, Fahri Vejuka thotë se kjo është një ngjarje e rëndë, ndaj i bën apel institucioneve shtetërore që ta lejojnë nipin e tij i cili është në burg që të rrijë në shtëpi për të pritur njerëzit.
“Shpresojmë që shteti të gjejë autorët e vrasjes sepse është një ngjarje shumë e rëndë që ka ndodhur. Pothuajse është shuar një familje pas kësaj ngjarje dhe institucionet do të bëjnë detyrën e tyre për çfarë ka ndodhur. Asmer Bilali është djali i Astrit Bilalit dhe Asmeri është në burg prej disa muajsh. Ai do të jetë vetëm në varrim, por ne kërkojmë që të lihet të paktën dy ditë tek banesa e tij për të pritur njerëzit sepse nuk ka askënd. Vëllai i tij 23 vjeç është shumë i sëmurë dhe nuk është askush tjetër. Shpresojmë që institucionet të vendosin dorën në zemër dhe të na mirëkuptojnë në kërkesën tonë. I falenderojmë që e kanë lejuar të jetë në varrim, por kërkojmë të qëndrojë pak më gjatë, të paktën dy ditë dhe normalisht me prezencën e policisë”, thotë Fahri Vejuka. Lidhur me ngjarjen dhe akuzat që rëndojnë ndaj nipit të tij, Vejuka ia lë në dorë institucioneve që të bëjnë detyrën. “Për të tjerat shteti të bëjë detyrën dhe nëse ka bërë diçka mund të dënohet, por sot i kërkojmë ta lejojnë të paktën dy ditë që të qëndrojë sepse do dalin dy kufoma nga shtëpia jonë”, deklaroi ai.