Në konferencën me gazetarët, kreu i grupit parlamentar i PS-së, Taulant Balla foli edhe për sulmin në uzinën e armëve në Gramsh ku thotë se dyshimet janë për aktivitet spiunazhi.
“Mendoj dhe vlerësoj se reagimi i gjithë zinxhirit të strukturave shtetërore, qoftë Ministrisë së Mbrojtjes, FA, të policisë dhe institucione të hetimit në Shqipëri ka qenë në nivelin më të lartë dhe më të mirë të mundshëm.
Dyshohet për aktivitet spiunazhi që është asgjësuar sapo ka nisur. Meritojnë vlerësimin maksimal. Shqipëria mbetet vend anëtar i NATO. Do këshilloja këdo, edhe gjelat e politikës së opozitës që të presin hetimet.
Të presin verdiktin që do të zbardhin të gjithë këtë ngjarje. Ka një shprehje popullore, opinionin për shqiponjën nuk e japin dot gjelat e detit. Të gjithë ata që bëjnë sikur janë shqetësuar, edhe pse janë me pushime dhe përdorin telefonin për statuse. Organet meritojnë një falenderim për reagimin e tyre dhe asgjësimin në kohë të një përpjekje që mund të jetë aktiviteti mirëfillte spiunazhi”.