Kryetari i Bashkisë së Matit, Agron Malaj i bën thirrje të rinjve që të bëhen pjesë e Forcave të Armatosura si një mundësi e shkëlqyer për zhvillimin e karrierës së tyre. Përmes një postimi në rrjete sociale, kryebashkiaku Malaj bën me dije se në takimin me Kolonel Altin Gjetajn nga Qëndra e Personale Rekrutimit dhe me përfaqësuesin e Ambasadës së SHBA dhe DASH, Karl Jeffery Ingram, u diskutua mbi rëndësinë e angazhimit të të rinjve në radhët e FA-ve.
“Procesi i rekrutimit në Forcat e Armatosura të Shqipërisë është një moment i rëndësishëm për komunitetin e ushtarakëve dhe shoqërinë në tërësi.
Në takimin e zhvilluar me Kolonel Altin Gjetaj nga Qëndra e Personale Rekrutimit dhe me përfaqësuesin e Ambasadës së SHBA dhe DASH Karl Jeffery Ingram, folëm për rëndësinë e angazhimit në radhët e FA-ve.
Si një ish-ushtarak nuk mund të mos i këshilloj të rinjtë t’i bashkohen Forcave tona të Armatosura, jo vetëm për forcën e karakterit dhe të disiplinës që të imponojnë, por edhe për mundësitë që të jepen nga ky institucion. Shërbimi për kombin është nder”, thekson Kryetari i Bashkisë Mat.