Prej vitesh po luftojnë për një jetë të sigurtë, por rruga e tyre që kalon nëpër dete, është edhe një vend “vdekje” për ta. E kemi fjalën për sirianët, dhe ngjarjet tragjike që kanë jetët e tyre.
Një vajzë 4-vjeçare siriane, humbi jetën nga etja në një varkë të bllokuar prej ditësh në mes të Mesdheut. Vajza e vogël ishte larguar nga Libani për në Evropë me prindërit dhe motrën e saj një vjeç e gjysmë. Lajmi raportohet nga mediat italiane të cilat citojnë aktivistin Naëal Soufi, i cili ishte i pranishëm në operacionin e shpëtimit.
“E qara e saj e pangushëllueshme do të kishte lëvizur edhe gurët. A e keni idenë se çfarë do të thotë për një prind të shohë një vajzë të vdesë në këtë mënyrë mizore?”, ka komentuar babai i saj, Ahmad Adbelkafi Nasif.
Familjarët, refugjatë sirianë në Liban që ëndërronin një jetë të re në Itali, ishin në një varkë me 60 persona të tjerë. Për 4-vjeçaren me emrin Loujin nuk mund të bëhej asgjë, ndërsa motra e saj më e vogël është e shtruar në spital pasi kishte gëlltitur sasi të mëdha uji të kripur në përpjekje për të shuar etjen e saj, por ajo nuk është në rrezik për jetën. Edhe prindërit e vogëlushes janë mirë, për momentin janë të gjithë në Kretë. “Zemra jonë është bërë hi”, thotë nëna e Loujin, fjalët e fundit të së cilës para se të vdiste ishin: “Më jep disa pika ujë, të lutem”.