Tre vajza me origjinë nga Kosova janë zhdukur që prej dy ditësh në Gjermani. Familjarët e adoleshenteve kanë humbur kontaktet që në 10 shtator, kur vajzat ishin nisur nga Lünen në drejtim të Bergkamen për të vizituar festivalin e qytetit.
Policia ka publikuar foto dhe të dhënat e tyre në faqen e internetit dhe kërkon informacion nga kushdo që mund t’i ketë parë.
Denisa, Anila dhe Suela, 16, 15 dhe 17 vjeçe, janë shqiptare të Kosovës me origjinë, por familjet e tyre jetojnë prej vitesh në Gjermani.
Një familjar i tyre kishte dalë për t’i pritur tek stacioni i autobusëve në Bergkamen, por që asnjëra prej tyre nuk u bë e gjallë atje.
Një zëdhënës i policisë gjermane ka thënë se kontakti i fundit ishte përmes Whatsapp rreth orës 21:30 të 10 shtator. Pas kësaj, telefonat e vajzave dalin të fikur.
