Dy vlonjatë janë vënë në pranga nga policia e Lezhës pasi u janë gjetur tre mina me telekomandë. Në sajë të operacionit të koduar “The long way”, policia ka goditur një tjetër rast të trafikimit të minave.
Si rezultat i këtij operacioni, u arrestuan në flagrancë A.L. 23 vjeç, dhe A. E. 21 vjeçe, të dy nga Vlora.
Gjithashtu u shpall në kërkim dhe po punohet për kapjen e E.E., 27 vjeç, nga Vlora, i dënuar më parë.
Gjatë kontrollit në çantat e tyre u gjetën të fshehura 3 mina me shpërthim të telekomanduar nëpërmjet celularit, si dhe një sasi prej 2.3 kg lënde narkotike e dyshuar marijuanë.
Materialet procedurale në ngarkim të tyre u referuan në Prokurorinë pranë Gjykatës Shkallës së Parë Lezhë për veprime të mëtejshme, për veprat penale “Trafikimi i lëndëve plasëse” dhe “Prodhimi dhe shitja e lëndëve narkotike”.