Nga data 1 tetor, të gjithë pensionistët do ta marrin pensionin e tyre të indeksuar në masën 6%.
Drejtori i Institutit të Sigurimeve Shoqërore, Astrit Hado rikonfirmon se shtesën e miratuar nga qeveria e përfitojnë të gjithë kategoritë e pensionistëve.
Ky është indeksimi i dytë që iu bëhet brenda vitit pensioneve, me qëllimin për të zbutur sadopak efektet që kriza e çmimeve po shkakton në xhepat e shqiptarëve. Duke shtuar edhe indeksimin prej 3.3% që u miratua në muajin prill, rritja e pensioneve për vitin 2022 shkon në masën 9.5%. Nga kjo shtesë përfitojnë 674 mijë pensionistë dhe ajo do të jetë e qëndrueshme dhe në fuqi deri në vendimmarrjen e radhës të qeverisë.