Dy shokë nga një darkë në Tiranë, shkuan në llixhat e Elbasanit, por aty humbi jetën 34-vjeçari Alban Pashallari. Ai së bashku me mikun e tij po lëviznin me një mjet, të cilin e parkuan në rrugë dhe rreth orës 22:00 shkuan pranë hotelit ku qëndrojnë personat që kanë nevojë për ujërat termale. Ndonëse nuk ishin klient në hotel, dy djemtë zgjodhën të qëndronin jashtë. Ata hapën rubinetin vetë për të mbushur pishinat e jashtme me ujëra termalë.
Por teksa qëndronte në llixha, shoku ka vërejtur se Pashallari ishte në gjendje gjumi dhe kërkoi ndihmë. Para grupit hetues, ai ka zbuluar se hëngrën darkë në Tiranë, morën birra dhe u futën në ujë. Por kur shoku nuk iu përgjigj, e zuri paniku dhe nisi të bërtasë dhe njoftoi shërbimet e urgjencës.
Nuk dihet ende arsyeja që mund t’i ketë shkaktuar vdekjen të riut. Policia po punon për të zbardhur rrethanat e ngjarjes.