Zyra Vendore Arsimore Kamëz ka reaguar lidhur me deklaratat e bëra nga përfaqësues të ndryshëm të PD lidhur me rikonstruksionin të cilët thanë se prishja e shkollave bëhej për korrupsion.
Madje u tha se rikonstruksioni po bëhej me dyfishin e çmimit.
Në reagim thuhet se nuk po posqyrohet realiteti në lidhje me punën serioze që po bëhet me arsimin në Kamëz.
“Në keqardhje të plotë për shpifjet dhe përdorimin e nxënësve të shkollave nën juridiksionin e Zyrës Vendore Arsimore Kamëz për interesa politike, dëshirojmë të bëjmë me dije se në të gjitha shkollat e ZVAP Kamëz procesi mësimor ka nisur më dt 12 .09.2022. Është për të ardhur keq që nuk pasqyrohet realiteti në lidhje me punën serioze që po bëhet me arsimin në Kamëz, nuk vihen re shkollat dhe godinat e reja që janë ndërtuar me të gjitha kushtet më të mira, të cilat sot janë fakt i prekshëm nga gjithë komuniteti.”
Sipas asaj që thuhet në reagimin e ZVAP Kamëz shkollat që janë bërë pjesë e rikonstruksionit janë institucione me kushte infrastrukturore të vështira dhe të rrezikshme për jetën e nxënësve dhe stafeve pedagogjike.
“Duhet të theksojmë se shkollat që janë bërë pjesë e rikonstruksionit janë institucione me kushte infrastrukturore të vështira dhe të rrezikshme për jetën e nxënësve dhe stafeve pedagogjike. Por, në asnjë rast nxënësit nuk përshkojnë 5 km për të ndjekur mësimin në godinat në të cilat janë zhvendosur. Pushteti lokal ka ofruar shërbimin e transportit (me autobusë) për nxënësit e këtyre shkollave.”
Ish deputetja e PD Mimoza Hajdarmataj njëkohësisht anëtare e Kryesisë së kësaj force politike në një intervistë për Ora News tha se “Denoncimet kanë ardhur nga prindërit dhe nga komuniteti. Nuk ka pasur diskutime me ta si mund të zgjidhet problemi. Ka dyshime që prishjet janë si rezultat i korrupsionit.”