Amnistia fiskale dhe penale është nisëm ligjore e ndërmarrë nga qeveria shqiptare për të falur të gjitha gjobat, kamatëvonesat e pasurisë që deklarohet, nëse kryhet regjistrimi i pasurisë së disponuar në 30-vjeçarin e fundit, të kryera deri në datën e hyrjes në fuqi të ligjit. Po ashtu personat që do aplikojnë për amnisti fiskale u ruhet anonimati dhe nuk i fillojnë procedurat e ndjekjes penale.
Eksperti i ekonomisë, Gent Beqiri, thotë se këmbëngulja e qeverisë për të miratuar projektligjin për aminstinë fiskale mund të lidhet edhe me zgjedhjet e ardhshme vendore.
“Ndoshta urgjenca lidhet me situatën ekonomike, me nevojën për të grumbulluar më shumë para; ndoshta dhe zgjedhjet e vitit të ardhshëm janë një element që bëjnë pjesë në këtë paketë. Normalisht, këta individë, në vend që të jenë subjekt i agjencive ligjzbatuese, bëhen subjekt i pastrimit të parave apo mundësisë për të bërë biznes. Është e kuptueshme që ka disa kohë që edhe qeveria edhe kryeministri e kanë lançuar atë, bazuar edhe në fushatën e pyetjeve me publikun. Ka shumë çështje dhe shqetësime që duhen të ngrihen”.