Nuk kanë fund skandalet në Shkodër. Pas Ernest Gjokës, kësaj here preh e kërcënimeve kanë rënë trajneri aktual Agim Canaj dhe administratori i Vllaznisë Suad Lici.
Mësohet se ky i fundit ka marrë kërcënime në lidhje me ecurinë e klubit kuqeblu, por edhe me futbollistë të caktuar, për të cilët Licit i është bërë presion se duhet të aktivizohen me patjetër në formacion.
Menjëherë pas kësaj situate të pakëndshme, administratori ka njoftuar, kryebashkiaken Voltana Ademi, e cila është njëkohësisht dhe presidentja e klubit, teksa është vendosur pezullimi i seancës stërvitore, e cila ishte planifikuar të zhvillohej në orën 11:30.
Ademi ka thirrur drejtuesit në një mbledhje urgjente, trajnerin Canaj, administratorin Lici si dhe drejtorin sportiv Firat për të diskutuar rreth kësaj ngjarjeje të shëmtuar. Pritet që në minutat në vazhdim, klubi të dalë edhe në një reagim zyrtar.
Kjo nuk është hera e parë që te Vllaznia kërcënohen drejtuesit apo jepen urdhra për të aktivizimin futbollistë të rinj, ndërkohë që në vitin e kaluar u sulmua fizikisht edhe ish-trajneri Ernest Gjoka/ panoramasport.al/