Këshilli i Sigurimit i Kombeve të Bashkuara voton këtë të premte rezolutën që dënon referendumet për aneksimin e katër rajoneve të Ukrainës të pushtuara nga Rusia.
Rezoluta e hartuar nga Shtetet e Bashkuara dhe Shqipëria, përmbajtja e saktë e së cilës nuk është ende publike, me shumë gjasë nuk do të miratohet për shkak të vetos ruse, por mund të paraqitet në Asamblenë e Përgjithshme të OKB-se.
Teksti i dokumentit dënon me forcë ato që Perëndimi i ka etiketuar si referendume “të rreme” që synojnë aneksimin e territoreve të një shteti Sovran. Ai u kërkon vendeve anëtare “të mos njohin asnjë status të ndryshuar të Ukrainës dhe të detyrojnë Rusinë të tërheqë trupat e saj nga shteti fqinj”, pohoi ambasadorja e SHBA në OKB, Linda Thomas-Greenfield.
Vendet perëndimore “kanë besimin se do të ketë mbështetje të fortë për integritetin territorial të Ukrainës në Asamblenë e Përgjithshme“, thotë Richard Gowen, analist në Grupin Ndërkombëtar të Krizave.