Për të caktuar datën për zgjedhjet lokale 2023, Presidenti Bajram Begaj do të takojë të gjithë faktorët politikë në vend. Pas takimit që pati me kreun e shtetit, Ilir Meta tha për gazetarët se kërkon që data të vendoset sa më shpejt.
“Ishte një kënaqësi që të takohesha me Presidentin me kërkesën e tij sot për të diskutuar për zgjedhjet e ardhshme vendore. Qëndrimi im është shumë i qartë që të shpallet sa më parë kjo datë në respekt të gjitha afateve kushtetuese e ligjore. E besoj se kështu do të ndodhë sepse një orë e më parë qytetarët e Shqipërisë duhet të shpëtojnë nga kjo zgjedhë moniste në pushtetin vendor nga ky shpërdorim i taksave të tyre, hapësirave, e gjithcka që ka ardhur nga degradimi i një pushteti monist vendor. Rikthimi i opozitës dhe pluralizmit politik në këshilla bashkiakë do japë kontribut për foricmin e llogaridhënies. Data konkrete i takon vetë Presidentit dhe nuk besoj se një javë më parë apo një javë më shumë është e rëndësishme. Data të dihet sa më parë e KQZ të ndërmarrë veprimet e saj”.
Po ashtu për takimin që kishte më herët me kreun e PD-së, Sali Berisha, Meta tha se u fol edhe për protestat. “Me zotin Berisha kemi folur edhe për zgjedhjet edhe për protestat folëm edhe për protestat dhe zgjedhjet. Pra kemi folur për fuqizimin e demokracisë”,-tha shkurtimisht Meta, pa dhënë detaje të tjera.