Gazetari Basir Çollaku thotë se rasti i agjentit që ndihmoi Ervis Martinajn të largohej nuk është i pari rast që policia bashkëpunon me krimin.
Në një intervistë për Euronews Albania, gazetari u shpreh se Ervis Martinaj kishte 16 mijë të punësuar kur bastet ishin zyrtare dhe paguante dhjetëra milionë euro për buxhetin e shtetit.
Sipas tij, kryeministri ka pasur dijeni për shumë nga zhvillimet që kanë ndodhur madje arsyeja kryesore pse u shkarkua drejtori i policisë ishte zhdukja e Martinajt.
“Dhe ka jo pak të akuzuar në oborrin e kryeministrit që janë të interesuar për biznesin e basteve. Nuk është rastësi që me zhdukjen e Martinajt të rikthehet interesimi për biznesin e basteve. Kryeministri ka dijeni, arsyeja kryesore e shkarkimit të Nanos ishte zhdukja e Martinajt”, tha gazetari.
9 gushti është dita kur familjarët e Ervis Martinajt humbën kontaktet me të afërmin e tyre. Prej orës 20:00 të asaj dite, ata nuk kanë kontaktuar me Martinajn edhe nëpërmjet personave të tretë.