Policia e Fierit ka arrestuar tre persona pas operacionit policor “Bashkëpunimi”, ku u zbulua se një lokal ishte përshtatur për përdorimin e drogës.
Gjatë kontrollit në lokal u gjetën doza me kokainë, 18.380 euro, 1 armë gjahu dhe municion luftarak.
Në pranga përfunduan Eduard Gjigoli (pronari i lokalit), Liridon Gashi (i dyshuar se furnizonte me lëndë narkotike pronarin e lokalit) dhe Donald Llupi (kamerieri).
Gjatë kontrollit të ushtruar në banesën e Gashit u gjetën dhe 6.5 kg lëndë narkotike cannabis sativa.
“Në vijim të punës për evidentimin dhe goditjen e paligjshmërive, bazuar dhe në informacionet e marra në rrugë operative se në një lokal ushtrohej veprimtaria e shitjes së lëndëve narkotike në doza, specialistët e Seksionit për Hetimin e Narkotikëve, në bashkëpunim me Komisariatin e Policisë Fier dhe FNSH Tiranë, kanë organizuar dhe finalizuar me sukses operacionin policor të koduar “Bashkëpunimi”, si rezultat i të cilit u bë kapja dhe arrestimi në flagrancë i shtetasve:
-E. Gj., 46 vjeç, banues në Dërmënas, për veprat penale ‘Prodhimi dhe shitja e narkotikëve’, ‘Përshtatja e lokalit për përdorim droge’ dhe ‘Mbajtja pa leje e armëve të gjahut’;
-L. G., 30 vjeç, banues në Pojan, për veprën penale ‘Prodhimi dhe shitja e narkotikëve’;
-D. Ll., 28 vjeç, banues në Pojan, për veprën penale ‘Moskallëzimi i krimit’”, thuhet në njoftimin e policisë.