Vladimir Putin ka shtuar sulmet në Ukrainë, pas goditjes së urës kryesore që lidh Krimenë me Rusinë.
Autoritetet në disa qytete të Ukrainës po raportojnë për sulme me raketa. Në Dnipropetrovsk qendror, Valentyn Reznichenko, kreu i administratës ushtarake rajonale, tha se kishte pasur një “sulm masiv me raketa në rajon. Ka të vdekur dhe të plagosur”.
Autoritetet në verilindje të Kharkiv raportuan po ashtu për sulme. Oleh Syniehubov, kreu i administratës ushtarake të Kharkiv, tha se kishte shpërthime në qytet. Kryetari i bashkisë së Kharkiv, Ihor Terekhov tha se “raportet fillestare tregojnë tre sulme në Kharkiv”.
Vitalii Kim, kreu i administratës ushtarake civile të rajonit Mykolaiv, tha se bombarduesit Tu-95 kishin nisur valë sulmesh me raketa, me 47 “predha” të shkrepura. “Frikacakët po godasin infrastrukturën kritike (në të gjithë Ukrainën)”.
Shpërthime u raportuan gjithashtu herët të hënën në qytetin perëndimor të Lviv dhe kryeqytetin, Kiev, ku të paktën tetë persona u vranë.