Ish-peshëngritësi Pirro Dhima u shfaq i emocionuar në studion e televizionit grek ERT teksa fliste për Aleksandros Nikolaidis, ish-atletin në Taekëondo, i cili u nda nga jeta në moshën 43-vjeçare për shkak të kancerit.
Duke kujtuar marrëdhënien e tij me Nikolaidis, Dhima nuk i mbajti dot lotët.
“Aleksandri më admironte, ai ishte fëmija më i mirë. Me Aleksandron jetuam shumë momente dhe ai më merrte në telefon gjithmonë duke më pyetur për Anastasian dhe për fëmijët. Njeri shumë i ëmbël, fëmijë shumë i sjellshëm. Kur u zgjova në mëngjes, sepse dje fjeta vonë në orën dy ishim mbledhur me shokët dhe kishim dalë, u ngrita të bëja gati Nikolakis për në shkollë dhe mora lajmin tronditës…Më morën në telefon dhe më kërkuan të them disa fjalë nesër në varrim, por nuk ia dal dot. Nuk mund të shkoj as në varrim”, rrëfeu Dhima.