Kryeministri Edi Rama zhvilloi këtë të premte një takim me qytetarë në Elbasan, ku foli për krizën energjetike dhe pasojat që ka shkaktuar lufta në Ukrainë.
Kreu i qeverisë u shpreh i vendosur se do të vendoset një taksë e jashtëzakonshme ndaj kompanive të prodhimit të energjisë. Këto të ardhura, sipas tij, do të përdoren për të ndihmuar shtresat në nevojë.
“Kjo është një taksë e jashtëzakonshme për një fitim i marramendës që vjen si rezultat i fatit dhe jo për fat të ndonjë investimi të veçantë. Fati i keq i njerëzisë e deshi që të fillonte një luftë, fat i mirë i këtyre që e solli t’iu bjerë sëpata në mjaltë Ne atyre do i vëmë një taksë të jashtëzakonshme për të mbledhur të ardhura plus të cilat nuk do t’i çojmë në buxhet në punë të tjera, por do t’i rishpërndajmë tek ata që janë në nevojë, duke filluar te pensionistët e duke vijuar tek të tjerët. Që nga viti 2013 nuk janë rritur asnjëherë pagat e ministrave, pagat e deputetëve, nuk kanë për tu rritur sa të jem unë këtu. Pse? Për një mesazh shumë të thjesht, Për faktin se për sa kohë ne nuk jemi në gjendje t’ua u rrisim të tjerëve pagën deri në momentin që të mund të rrisim pagën tonë, ne nuk do ta rrisim pagën tonë”, tha Rama.
Po ashtu, Rama u ndal edhe te protesta e pedagogëve, ku nuk ngurroi të përsërisë akuzat në drejtim të kreu të Sindikatës së Punonjësve të Universiteteve, Sandër Kovaçi.
Ai tha se shumica e pedagogëve janë në mësim, por shtoi se një pjesë e tyre të drejtuar nga një ish-SHIKS kërkojnë të krijojnë idenë “sikur po bëhet nami për llogari të non gratave”.